Ntepe-Manama FM
Kusacubungulwa ukuba umgwaqo we Gwanda-Manama (Mawane) ungalungiswa njani, nanko ke lumgwaqo usugcwele amagodi, awusahambeki.
Abatshayeli bathi umgwaqo lo utshaphazwa ngama gonyethi ama China asebenza eGwanda iLithuim, abemba bese Mandihongola ( Gwanda South).
Izakhamizi zibika ngenhliziyo ebuhlungu ukuba lawo magonyethi avusa uthuli njalo, avithiza umgwaqo.
Omele abantu be Gwanda South Constituency edale le phalamende njalo engumsekeli kaMinister owezokwethula, lokusakazwa kwemibiko uHon Dr Omphile Marupi uhambe labo manjinela eMawane ukuba babonisane ukuthi bangawulungisa njani umgwaqo lo.
UManjinela wezemigwaqo eZansi yemaNdebeleni umnumzana Mangis Nkomo uthe umgwaqo lo usufuna ukulungiswa katsha.
“Isimo salumgwaqo we Gwanda-Manama usumubi kakhulu njalo thina sithi umgwaqo lo ufuna ukulungiswa katsha ikakhulu lapha eMawane. Thina njengabantu abakhangele ngemigwaqo, iGwanda-Manama ikunhlelo zethu ezimqoka zalumnyaka. Sikhangelele ukuthi sizalungisa katsha i 7km. Sisakhulumisana leGwanda Lithium ukuba layo ingenele ukuze isincedise ukwakha lekuvaleni amagodi, lokunye okuzenza umgwaqo wethu uhambeke,” kubika u Manjinela uNkomo.
UPatrick Dube ongumkhokheli wamabhasi kaGreenhorse laye obeseMawane utshengise ukukhathazeka ngesimo somgwaqo.
“Umgwaqo lo, awusahambeki usumubi. Khathesi ibhasi itshona ilungiswa isiqamulile ezinye insimbi igijime kabili kathathu okunye kuyabe sekuqamukile njalo. Konke lokhu kubangelwa ngumgwaqo lo osumubi kakhulu. Ukufa komgwaqo kuyamisa intuthuko. Sifisa iziphathamandla zisilungisele umgwaqo loo, ngokuphangisa, kubika uMnu Dube.
Inkokheli lazo zifuqa ngamandla ukuba umgwaqo ulungiswe ngokuphangisa ukuze ingqubekela phambili lentuthuko ingami.
Omele abantu be Gwanda South Constituency edale lephalamende uHon Dr Omphile Marupi uthi uthathe inyathelo leli ukuze kube lesi sombuluko ngalumgwaqo.
“Injongo yokubiza omanjinela lapha yikuthi bebone isimo esikhangelane laso njalo babone ukuthi kungenziwani ukuze kulungiswe umgwaqo. Omanjinela yibo abazacubungula ukuba kufunakalani njalo bebone ukuthi sincediseka njani.
“Umgwaqo lo uqakatheke kakhulu ngoba uxhumanisa iZimbabwe le Botswana. Isibhedlela se Manama, ama Irrigation kukanti labantu abathengisa izifuyo, osomabhizimusi basebenzisa lumgwaqo ukuze bafinyelele imkambo. Ukuze bafike emkambo lempahla zabo ngesikhathi kufunakala umgwaqo omuhle,” kubika uHon Dr Marupi.
Izakhimizi labatshayeli bakulowo mango baphezulu kokuloba isikhalazo, esikhonona ngalumgwaqo.
