NguMilton Mashasha
GWANDA-Zithatha izinga elibanzi izakhamizi zePelele koMbirwane kuWard 12 ngaphansi kweNduna umama uKetso Mathe koBolamba emhlubulweni wezansi lemandebeleni bekhokhelwa nguMphathisigaba uMnumzana Right Mabanga lapho abaphume njengesigaba besiyohlanza, ukulaphela lokuhlambulula umhlabathi leganga belungiselela lokucela izulu emveni kwesikhathi sokuna kwezulu.
Ekhuluma lozulu uRight Mabanga emveni kokuba abantu basabalale bangene iganga ekuseni besiyalungiselela ukuthi izulu lithwala njalo kuhle ngokuthula.
“Ngiyabonga ukuthi libuyile ngobunengi bethu, siyayazi injongo yethu namhlanje, umhlabathi wethu leganga akumanga kahle, kugcolile, yikho ngiyalikhulula ngithi asihambeni njengoba sinje sidobhe amathambo, amalembu lakho konke okulengayo ezihlahleni okugoqela izidleke, sitshisa lokugamula izihlahla ezatshaywa lizulu zasala zilokhu zimile kukanti leziwileyo zalala phansi lazo ziyaganyulwa zibuthelelwe zitshiswe, ” kutsho uMnu Mabanga.
Ziphuma ngokunjalo lezo zakhamizi, zikhona ezinye izalukazi ezisala lapho okuzafikela khona labo abaphume ijumo ezihlahleni leyo ndawo ibizwa kuthiwa kuse” ntolo” kuleyo ndawo izalukazi ziyabe zilinde amaqaga amahewu lawotshwala zitshaya igungu kugiywa ngokunjalo baze baphenduke.
Ekhuluma lentateli emele iMatebeleland Pulse ugogo uJulia Dube obesentolo ongomunye ololwazi ngenhlelo zesintu.
“Sivela khona ukuyalaphela lokukhuluma sicela izulu, leyo ndawo ayihanjwa ngumuntu wonke kuhamba umuntu oyedwa abanye bonke bayasala umangonyana belinde ukuphenduka kwakhe, lokhu kweziwa abantu bengakaphumi besiya egangeni, siyakujabulela lokhu okuthethwe yisigaba ngoba singasakwazi ukuthi singaba soneni nanko alisani kahle izulu, isomiso esikhona siyesabisa engxenye singabuyela kumasiko endulo kungabanganeno, line izulu njengamandulo.
“Uqhubeke esithi laba abasele lapha belinde ukubuya kwabahambe egangeni bazabahlangabeza behlabela njalo bebiza izulu, besithi izulu, izulu, izulu kuthi abasabelayo bayabe bevumela labo besithi kaline, kaline, kaline kuhlatshelwa kukhala igungu kutshaywa amakhwelo, iphululu lophondo kugiywa kanjeya njalo kunathwa kuwoswa inyama nxa kuyikuthi babelenhlanhla bahlangana lenyamazama ibanjwe yisiyezi salelosuku olukhulu yawela phambili kwabo zayibamba zayithukuza izinja hatshi bayazibamba lezo babuye lazo zidliwe nguzulu obuthene lapho, ” kulandisa ugogo uJulia Dube.
Ugogo uMapula Ndlovu ohlala kulesisigaba sePelele yena owazalwa ngo1926 uthe kuqakathekile ukulandela amasiko endulo.
” Sakhula thina lokhu okokudobha lokutshisa amathambo kugeziswa indawo kukhona ngesikhathi sikhangelane lokuna kwezulu, iganga liyabe ligcolile, yikho bebephuma badobhe batshise ukuze nxa izulu libuya lithole egangeni kuhlanzekile isikhathi esinengi izulu elakuqala liza ngolaka lilokuduma ukuphazima lombane, imbangela kuyikugcola kweganga kuyabe kugcwele amathambo indawana yonke lokunye ngoba labantu bayabophela amaphepha kanye lamalembu ikakhulu amalembu abomvu okungamalembu amabi kakhulu izulu kalihambelani lawo yikho kumele ethulwe ezihlahleni atshiswe, yebo siyakwazi ukuthi abangeke badobhe indawo zonke kodwa okuqakathekileyo yikuphungula leyo ngcekeza kuzathi izulu lakuqala lizabuya likhukhula ligezisa leyo ngcekeza yikho isikhathi esinengi izulu lakuqala liza ngokuduma okukhulu lombane kuthi kusiya ngesikhathi awubonike selisina kahle ngokuthula.
“Endulo izalukazi lamaxhegu abangasayi emacansini yibo ababesenza lowumkhuba manje kulezinsuku sekuhamba zona isane kambe kungalunga, kudala ubuhlangana labo bengavunulanga besegangeni bedobha lokutshisa amathambo, amalembu, amaphepha kanye lezihlahla ezatshaywa ngumbane ngoba kungumkhuba.
“Lokhu okokukhangela izulu ngemitshina yakulezinsuku bekungekho, thina besisithi singabona inkanyezi okuthiwa nguSilimela ihamba, iqonda ephumalanga kumbe entshonalanga kumbe ikhanyisa ngokukhanya okuthize besihle sibekwazi ukuthi hatshi izulu linengi lonyaka kukanti singabona uMfansimbi wehlile ekuseni kumhlophe nke egangeni, emfuleni kanye lezintabeni besikwazi ukuthi izulu likhona, “kulandisa ugogo uMapula Ndlovu.
Ekhuluma lentateli yeMatebeleland Pulse uRodger Dube uthi,” Siphumile sadobha satshisa amathambo lezihlahla ezimbalwa ezatshaywa ngumbane eduzane lemizi nje hatshi kuhambe kahle, “kubika uMnu Dube.
UKefasi Dube omunye oyisakhamuzi sakuleyindawo yePelele koMbirwane obekhokhela olunye uluhlu lwabantu abangene egangeni besiyayenza lowumkhuba wokuhlambula iganga ubike ukuba bahambe kahle badomba lokutshisa amathambo.
” Seliphendukile, sihambe kahle sibili, sadobha amathambo endaweni ezinengi sibili konke bekukuhle asizange sihlangane lokubi, siyabonga ukuhlangabezwa esitsho ebizela esithi izulu, izulu, izulu bevumela ngokunjalo besithi aline, aline, aline, begiya, kukhala igungu, kutshaywa amakhwelo lomphululu ebakhokhela ngokugida lokuhlabela.
“Konke lokhu okulapha kudliwa kunathwa lapha akusalayo kuyatshiswa lokucithwa akula lutho oluthwalwayo lusiya emakhaya, “kubika uMnu Dube.
UMnumzana Right Mabanga uMphathisigaba ubonge uzulu ngokuphatheka kuleluhlelo.
” Siyalibonga lonke, kuqakathekile ukulandela amasiko ngoba ukulahla amasiko ethu yikho okunye okubangela ukuthi izulu lingani kahle, lingananzelela sesiphila ngamasiko okwebolekwa aphetsheya okuyinto embi esintwini sakithi, bakithi asibuyeleni esintwini sakithi silandele amasiko ethu omdabu, likhululiwe selingacitheka, “kuphetha uMnu Mabanga.
