Buhlebenkosi Nkomo
Ngokwesintu samaNdebele ukulobola yindlela yokuhlanganisa imuli ezimbili lokwakha ubuhlobo obuqinileyo. Amalobolo awakhitshwa ngenjongo yokuthenga umuntu, kodwa ngawokubonga abazali bentombi ngokuyikhulisa lokuyinakekela. Kudala amalobolo ayekhitshwa ngezinkomo, lanxa lamuhla abantu abanengi sebesebenzisa imali ngenxa yokuguquka kwempilo.
Ingqubo yokulobola iqala ngokufika kwabakhongi emzini wentombi lapho kukhitshwa khona isivulamlomo esivula inkulumo phakathi kwemuli zombili. Imali le inikwa abadala bomuzi ukuze kuvunyelwe ukuqhubeka kwengxoxo yokucela umntwana.
Ngemva kwalokho kulandela amalobolo kayise wentombi, angaba yimali loba inkomo yokubonga uyise ngokukhulisa umntanakhe.
Unina laye uyahlonitshwa ngesabelo sakhe esivame ukubizwa ngokuthi yinkomo kamama loba inkomo yohlanga. Inkomo le inikwa unina wentombi njengokumbonga umsebenzi wokukhulisa umntwana kanye lokugcina isithunzi semuli.
Kulezipho ezilethwayo ezifana lezembatho zabazali lengubo zikamama, konke kwenziwa ngenhlonipho lokubonga imuli yentombi.
Ngesikhathi somkhosi womtshado kuvame ukuhlatshwa inkomo ukuze izihlobo zidle zithokoze. Inkomo le isetshenziswa ukuhlanganisa abantu lokuqinisa ubuhlobo phakathi kwemuli zombili.
Ngokwesintu umtshado wawungapheleli kuphela ekuloboleni kodwa wawuhamba lemikhuba ehlanganisa ingqubo yonke yokwamukelwa kukamalukazana emzini omutsha.
Ukucolwa Kukamalukazana
Ukucola yindlela yokwazisa amadlozi ukuthi umntwana usephuma egumeni esiya emzini omutsha ukuze aqhubeke evikelwa njalo amukelwe yidlozi lemuli entsha.
Umalukazana ucolwa losanyongwana wakhe. Kuyahlatshwa inkomo kumbe imbuzi bathelwe ngenyongo yayo ezandleni lasezinyaweni zabo. Nxa sekwenziwe lokhu, inyongo leyo igqiziswa ivuthelwe ngomgetsho kumbe ngotshani bomfula obuthiwa luseza.
Amazilo Lenhlonipho Emzini
Nxa sekwenziwe ukucolwa, umalukazana kumele atshengise ukuhlonipha uyisezala bengakahlawulani. Kumele amnike isifuyo kumbe imali anduba bedle bonke. Kuthiwa angatholwa nguyisezala esidla elokudla emlonyeni, uphuma egijima ayekukhafula phandle ngenxa yenhlonipho.
Kuyazila ukuthi abize amabizo kamamazala loyisezala. Ngesintu akumelanga awabize. Nxa engena endlini kayisezala akumelanga ahambele esandleni sokudla.
Amazilo la ayesenzelwa ukugcina inhlonipho, ukuthula lobudlelwano obuhle phakathi kukamalukazana lemuli ayendele kuyo. Lokhu kwakwenziwa ngoba ngokwesintu ukuhlonipha abadala kwakuyisisekelo sokuthula, ukuzwana kanye lokuvikela ukungazwani emzini.
Amasiko la ayengagcini ngokuhlanganisa imuli kuphela kodwa ayeqinisa inhlonipho, ubuntu lobunye phakathi kwabantu emulini lasemphakathini
