Impahla YeZimbabwe Isingena eChina NgeZero-Tariff
Matebeleland Pulse Reporter
IZimbabwe Revenue Authority (ZIMRA) isimemezele ukuqala kokusebenza kohlelo lweZimbabwe leChina olubizwa ngokuthi yiEarly Harvest Arrangements, oluzavumela impahla ezivela eZimbabwe ukuthi zingene emakethe yeChina zingabhadali umthelo wokungenisa impahla (zero tariff), nxa zihlangabezana lemigoqo ebekiweyo.
Uhlelo lolu luzaqala ukusebenza mhlaka 1 Nkwenkwezi 2026. Luhlose ukuqinisa ubudlelwano phakathi kweZimbabwe leChina kanye lokuvulela abathumela impahla amathuba emakethe yaseChina.
Impahla ezihlanganiswe kuloluhlelo zibalisa izilimo, amaminerali kanye lempahla eyenziwe emafekithaleni. Ukuze impahla ithole ilungelo lokungabhadali umthelo wokungenisa, kumele ibe ivela eZimbabwe njalo ihlangabezane lemithetho ye-Rules of Origin, eqinisekisa ukuthi impahla yenziwe kumbe yacubungulwa ngokwanele elizweni.
Uhlelo lolu luzasebenza kuze kube mhlaka 30 Mabasa 2028. IZIMRA ithe abathumela impahla eChina kumele balandele yonke imithetho yeCustoms njalo bathole i-Certificate of Origin (CoO) evela eZimTrade, eqinisekisa ukuthi impahla yabo iyafaneleka ukuthola ilungelo lokungabhadali umthelo wokungenisa.
Abathumela impahla yezilimo bakhuthazwe ukuthi bahlangabezane lemigoqo yeChina ephathelane lekhwalithi kanye lezempilakahle yezilimo ukuze impahla yamukelwe ngaphandle kwenkinga.
Abathengisi kumele njalo bagcine amarekhodi apheleleyo agoqela ama-invoyisi, amaphepha okuthutha kanye lamadokhumenti eCustoms. Kumele futhi babhalise kuhlelo lweZimbabwe Electronic Single Window (ZESW) ngaphambi kokusebenzisa lolu hlelo.
IZIMRA ithe i-Early Harvest Arrangements kulindeleke ukuthi yandise ukuthunyelwa kwempahla yeZimbabwe eChina, ivulele abalimi, izembamgodi, abenza impahla kanye lamabhizimusi endawo amathuba amatsha okwandisa ukuthengiswa kwempahla yabo emazweni angaphandle.
