Buhlebenkosi Nkomo
Esintwini, umsebenzi wamalobolo wawungagcini ngokukhipha inhlawulo kuphela. Kwakuyisikhathi esigcwele inhlonipho, ukuzithoba kanye lokulandela imithetho yesintu eyayigcinwa ngabadala.
Lanxa ezinye zalezi zimiso sezaxegiswa ngenxa yokuguquka kwezikhathi, abadala bathi ezinye zazo zazisiza ukugcina isithunzi somsebenzi kanye lokuhlonipha imuli zombili.
Ukungena Emzini Ungamenyezwanga
Kwakungavunyelwa ukuthi abakhongi bangene nje emzini bafike bakhulume udaba lwabo bengakaze bamukelwe. Babeqala ngokucela imvumo yokungena njalo bacele umlilo ngaphambi kokwethula injongo yabo.
Ukuphazamisa Abadala Ngesikhathi Bekhuluma
Abantu abatsha babengavunyelwa ukusukuma bekhulume phakathi kwengxoxo yabadala. Udaba lwamalobolo lwalusingathwa ngabantu abadala abakhethiweyo kuphela.
Lokhu kwakusenzelwa ukugcina ukuhlonipha kanye lokuvimba ukuxokozela ngesikhathi sokuxoxisana.
Ukuphanga Ukubala Imali Yamalobolo
Kwamanye amakhaya kwakubhekwa njengokungahloniphi ukuphanga ubale imali phambi kwabantu bonke ngendlela etshengisa ukuzigqaja loba ukudelela.
Abadala babesebenzisa ulimi oluthambileyo kanye lenhlonipho ngesikhathi bekhuluma ngemali kumbe ngenani lezinkomo.
Ukugqoka Ngokungafanelanga
Abakhongi labanye ababemele umdeni womkhwenyana kwakulindeleke ukuthi bagqoke ngendlela ehloniphekayo. Ukugqoka okwakungakhombisi ukuhlonipha umsebenzi kwakungamukeleki.
Ukufika Uphandlwe ngamagwebu
Ukufika ngesikhathi somsebenzi wamalobolo uphandlwe ngamagwebu kwakubhekwa njengehlazo elikhulu. Umuntu ophandlwe ngamagwebu wayengaphucwa ilungelo lokukhuluma loba amelwe ngomunye.
Ukuxoxa Izindaba Zasemzini Phandle
Izindaba ezazikhulunywa ngesikhathi somsebenzi zazivame ukuhlala phakathi kwemuli ezimbili.
Ukuphuma uyelanda yonke imininingwane emaphandleni kwakubhekwa njengokwephula imfihlo yomsebenzi.
Ukudelela Abakhongi aloba Abazali Bentombi
Lanxa kwakuba lokuxoxisana okuqinileyo kwezinye izikhathi, kwakungavunyelwa ukuthi kube lokuthukana, ukwedelelana kumbe ukuhlazisana phakathi kwemuli.
Inhlonipho yayihlala iqakathekile kusukela umsebenzi uqala kuze kuphele.
Ukungalandeli Amazwi Abadala
Abadala babeyizikhokheli zomsebenzi. Ukuphikisa izinqumo zabo ngendlela yokweyisa kwakubhekwa njengokwephula amasiko.
Amasiko Atshintshile Kodwa Inhlonipho Iseseqakathekile
Lanxa ezinye izimiso seziguqukile ngenxa yempilo yesimanje, izifundiswa zamasiko kanye labadala bathi umango wamalobolo usalokhu ufana — ukuhlonipha, ukubumbanisa imuli kanye lokugcina ubuntu.
Abadala bagcizelela ukuthi amasiko angaguquka, kodwa inhlonipho eyayiyisisekelo somsebenzi wamalobolo akumelanga ilahleke.
